Заменик министерката за животна средина и просторно планирање, Ане Лашкоска, учествуваше на панелот на високо ниво „Обединети за климата – Акција за адаптација и регионална соработка“, кој се одржува во Тирана, во организација на Министерството за животна средина на Албанија и ГИЗ, во рамките на Регионалното партнерство за климата меѓу Германија и земјите од Западен Балкан, информираат од МЖСПП.
На конференцијата учествуваат министри задолжени за климатските политики од регионот, како и други високи претставници, со цел зајакнување на политичкиот дијалог и координацијата во справувањето со климатските предизвици.
-Панелот на високо ниво претставува значајна платформа за лидерство и соработка, насочена кон унапредување на регионалната агенда – од планирање кон имплементација и од индивидуални пристапи кон усогласена, заедничка акција. Во фокусот на дискусијата беше прашањето како регионот може да ги преточи обврските за адаптација во конкретни и одржливи решенија, преку засилена регионална соработка и координиран пристап, се вели во соопштението од Министерството.
Во своето обраќање, Лашкоска се осврнала на тековните активности на Министерството за животна средина и просторно планирање во насока на воспоставување на функционална рамка за адаптација на најранливите сектори кон климатските промени, нагласувајќи дека регионалната соработка претставува суштински инструмент за справување со заедничките климатски ризици.
-Само преку координиран регионален пристап можеме да изградиме отпорни системи и да обезбедиме долгорочна заштита за нашите граѓани и економии, истакнала Лашкоска.
Регионалната соработка, како што беше посочено, овозможува унапредување на знаењата преку размена на искуства и методологии, но и отвора нови можности за пристап до меѓународни финансиски механизми за поддршка на климатските политики.
Во таа насока, Министерството за животна средина и просторно планирање останува посветено на продлабочување на регионалните партнерства и усогласување со европските стандарди, со јасна цел – трансформација на климатските политики во конкретни резултати што носат директни придобивки за граѓаните и обезбедуваат одржлива и отпорна иднина.
МИА
