189 холандски туристи го заменија карантинот во нивната земја за осум дена доброволно затворање во грчко одморалиште.
Се работи за тест кој би требало да покаже дали можат да се организираат безбедни годишни одмори во текот на пандемијата на ковид-19, пишува Блиц.
Учесниците на пробниот одмор за 399 долара по лице добиваат полн пансион, вклучително и пристап до базен, ресторани и други објекти во хотелот „Мицис“, но ништо друго.
Покрај редовните тестови за коронавирус и почитување на растојание од 1,5 метри, „туристите“ мораат да се задоволат со поглед на Егејското Море од своите соба или тераси бидејќи никому нема да му биде дозволено да го напушти одмаралиштето во кое ќе има само гости.
И покрај рестрикциите, побарувачката за патувањето била висока, а аплицирале дури околу 25.000 луѓе.
Грција, која практично зависи од туризмот, сака да ги привлече луѓето назад, после катастрофалната 2020 година во која бројот на посетители паднал на четвртина во однос на претходната година.
„Многу е важно луѓето да почнат да ни доаѓаат“, вели Константинос Тераслиас, заменик градоначелник на Родос, четвртиот по големина грчки остров.
Холандскиот оператор „Санвеб“, кој го организираше ова патување поддржано од владата, се надева дека експериментот ќе покаже дека луѓето и понатаму можат да уживаат во одмор, дури и под строги мерки на безбедност и да втемелат патот на повторно отворање на туризмот.
„Ова е многу важно за туристичката индустрија. Мислам дека нема многу компании да преживеат уште едно лето без патувања“, истакнува извршниот директор на „Санвеба“, Матијс тен Бринк. Тој, сепак, укажува дека затворањето на луѓе во одморалиштата веројатно нема да биде долгорочно решение.
