Растителните видови кои ги одгледуваме на отворено или во пластеници се изложени на ниски температури, а за да може што подолго да ги користиме или да ги зачуваме во текот на зимата, потребна им е заштита.
За таа цел најчесто се користи агротекстил. Неговата предност е што е лесен материјал кој не ги оптоварува и оштетува растенијата, пропушта вода и светлина и овозможува циркулација на воздухот. Растенијата што ги покриваме продолжуваат да растат и да се развиваат.
Најчесто се заштитуваат грмушките рози, овошјето и четинарите, виновата лоза, украсните растенија. Од зеленчукот најчесто се покрива спанаќот, младиот кромид, празот и зелената салата, но и други култури како ротквици, рукола, магдонос и зелка.
Се изработуваат од полипропиленски влакна и имаат различни намени. Во зима најчесто се користи зимски бел агротекстил кој штити од мраз и студен ветер и не дозволува температурни флуктуации во зоната на покриените растенија.
Неговата дебелина е 50 г/м². Температурата под неа е за 5ºC повисока од околината. Почвата под агротекстилот преку ден се загрева побавно, но и ноќе побавно се лади. Температурните осцилации се помали, а растението има способност да се прилагодува на промените. Наводнување, доколку е потребно, може да се врши и преку покривката.
Поставувањето е едноставно и може да се направи со прекривање или замотување. Ниските растенија се прекриваат. Предноста е што со агротекстил можеме директно да ги прекриеме растенијата како зелената салата или спанаќот. Најважно е добро да се прицврстат рабовите со нагрнување на почвата, поставување наменски клинови, подебели гранки или некој друг материјал. Не смее премногу да се затегнува. Се поставува на височина што им овозможува на растенијата непречено да растат.
Постигнува одлични резултати во производството на зелка, зелена салата, рукола, спанаќ, но и грав, млад кромид, блитва и ендивија.
Кога се заштитуваат грмушките рози, четинари, лековити или украсни растенија, целата грмушка се завиткува, а потоа се врзува со јаже или врзивно средство за да се спречи продирање на ветрот.
Денес, на продажба може да се најдат специјални навлаки за грмушки, кои едноставно се навлекуваат преку грмушката.
