Се решава проблемот со пристапот до земјоделските површини и индивидуалните земјоделски стопанства во месноста Долни Бавчи во Делчево, информираа од Општина Делчево. Активноста ќе се реализира како дел од Програмата за рурален развој за 2022 година на Министерството за земјоделство, шумарство и водостопанство преку поддршката на планските региони за изградба на земјоделски патишта во Делчево.
-Преку овој проект ќе се рехабилитира земјоделскиот пат во должина од 1000 метри, пат кој води од мостот на улица „Индустриска“ покрај реката Брегалница во месноста Долни Бавчи. Вредноста на Договорот за изградба на овој земјоделски пат е 1,8 милиони денари, информираа од Општина Делчево.
Додадоа дека градежните работи ќе се реализираат согласно договорот за рехабилитација на земјоделски – полски пат во Долни Бавчи, за кој градоначалникот Горан Трајковски и министерот Љупчо Николовски во Струмица потпишаа договор во рамки на настан кој беше во организација на МЗШВ.
По тој повод, Трајковски истакна дека со реализацијата на овој проект се решава и уште еден проблем на земјоделците.
-Земјоделците во месноста Долни Бавчи ќе добијат соодветна патна инфраструктура. Тоа значи полесен пристап до земјоделските површини или до нивните објекти. При поројни дождови беше оневозможено движењето со возила и со земјоделска механизација до земјоделското земјиште на овој терен. Како Општина го слушаме гласот и потребите на граѓаните и со еден сериозен пристап, бараме трајно решавање на проблемите, рече Трајковски.
Општина Делчево пред три месеци ја заврши рехабилитацијата на полскиот пат с. Вирче-с. Град во должина од 1000 метри, а неодамна е потпишан и нов Договор со Центарот за развој на ИПР за втората фаза од рехабилитацијата на селскиот пат во должина од над 320 метри и поврзување со сообраќајната инфрaструктура.
