Кавадарчани да внимаваат каде истураат комиње, засега против неодговорните се спроведуваат само опомени, но ќе следуваат и санкции за несовесните, ако продолжи несоодветното третирање на отпадот при печење на ракија.
Ова е ставот што го искажаа надлежните општински служби за МИА, околу проблемот со ослободувањето од комињето кој го создаваат поединци.
– Имаат реагирано и граѓани, но и од комуналното претпријатие. Несовесни истураат комиње или до контејнери, или во контејнери со зафатнина од еден кубен метар, иако на неколку локации се поставени поголеми контејнери со зафатнина од 5 кубни метри, во кои се препорачува да се истура комињето. Исфрлањето на комиње директно на депонијата е бесплатно, појаснија од Општината.
Има и граѓани кои се жалат дека соседите фрлаат комиње во своите дворови, но многу блиску до нивните, па не можат да излезат на тераса или да отворат прозорец, поради мушичките кои доаѓаат по комињето.
МИА
