Оревите годинава ги има многу и веќе е време тие да се соберат. Но, многумина се прашуваат како да ги зачуваат овие плодови што е можно подолго без да се расипат?
Чувањето на оревите, е полесно од чувањето на јаболката или на коскестото овошје. Но поради тоа што содржат големи количини на масло во јатката ( 50-70%), чиј основен состав се незаситените масни киселини кои на високи температури оксидираат, јатките можат да го изгубат вкусот и да станат неупотребливи за јадење. Затоа оревите треба да се чуваат во темни и ладни простории или ладилници на температура од 1-4 степени Целзиусови и при релативна влажност на воздухот од 60-65%. Оревите содржат 10-12% вода, затоа пожелно е пред складирањето да се исушат. Вака чувани оревите можат да траат од 12-24 месеци. Доколку плодовите не се претходно исушени, односно ако содржината на вода не е сведена на 12%, тогаш треба да се чуваат на температура од 0 степени Целзиусови и релативна влажност од 70%.
Покрај обезбедување на веќе споменатите услови за чување на оревите, исто така е неопходно е да се остави простор помеѓу амбалажата за да може воздухот полесно да циркулира.
Чувањето на јатките е покомплицирано. Влагата, топлината, светлината и воздухот се фактори кои влијаат врз квалитетот на јатките од орев.
Најдобар вкус на јатките и стабилност на бојата се постигнува ако при складирањето тие содржат од 3-3,5 % вода. Јатките исто така најдобро е да се чуваат во ладилници на температури од 1-4 степени Целзиусови во темно и на тој начин се постигнува подолга стабилност на незаситените масни киселини.
Извор: Агроинфо
