Не ретко земјоделците кога ќе ги прашаме дали пријавуваат за субвенции, знаат да бидат скептични и да кажат дека не веруваат дека може да добијат пари од држaвата за нивното производство.
Таков беше случајот и со земјоделецот Сали Велиоски, сериозен производител кој на 13 декари одгледува јагоди. Кога го прашавме дали користи субвенции, ни рече дека досега не аплицирал оти не верува дека ќе добие пари од државата.
На наше инсистирање дека тоа се пари кои државата ги одвојува за земјоделското производство, и доколку ги исполнува условите, за 1 ха под јагоди ќе добие субвенции во висина од 33.000 денари по хектар, односно 39.600 денари по хектар за земјоделски стопанства со пријавена површина за финансиска поддршка од минимум 1 хектар до максимум 5 хектари, Велиоски се согласи да дојде во Подрачната единица на МЗШВ во Кисела Вода и да аплицира за субвенции. Секој земјоделец се пријавува во онаа подрачна единица на министерството за земјоделство во општината која се води по лична карта.
Прво што требаше да се направи е да се запише во Единствениот регистар на земјоделски стопанства, односно да се евидентира како производител, со имотни листови од парцелата и да го запази рокот за аплицирање. Првично тој рок беше до 31. мај но денеска министерот Аријанит Хоџа најави дека рокот се продолжува до 30 јуни што значи дека Велиоски ќе го запази рокот за пријавување и годинава ќе може да ги добие субвенциите кои му следуваат со закон.
