Сезонските работници во земјоделството се изложени на бројни прекршувања на работничките права во Германија, се наведува во извештајот на сојузот „Fait Agriculture Initiative“, кој ја истражува сезонската работа во таа земја.
Во него е утврдено дека најмногу вработени годинава дошле од Романија, а потоа следат Полска, Хрватска, Украина, Бугарија и Грузија.
Поради кршење на човековите права, синдикатите бараат од следната влада да ги спроведе социјалните правила што ги налага Заедничката земјоделска политика (ЗЗП) на ЕУ и во овој случај да не ги користи погодностите од преодниот период одобрен од Европската комисија, туку да почне да ги применува во 2023 година, пишува Еuractiv.
За време на теренските истражувања, претставниците на иницијативата наишле на нецелосни исплати на плати, големи одбитоци, но и недостаток на социјално и здравствено осигурување и несоодветно сместување. Недостигала и контрола. Според извештајот, во Баварија царината извршила само две до четири контроли во моментот на берење аспарагус.
Сојузот објави дека бројот на сезонски работници останал сличен на нивото пред пандемијата. Германија им забрани влез на странски работници во земјата на почетокот на појавата на ковид. Но, по кратко време им беше дозволен влез под одредени услови за да се спречат проблеми во земјоделското производство.
Законските прописи лошо се спроведуваат
Извештајот покажува дека мерките за пандемијата биле прекршени, а државата ретко ги проверувала фармите. Според Харалд Шаум, заменик претседател на германските синдикати IG BAU, тоа е можно поради лабавите законски прописи и нивното неспроведување.
„Со текот на годините тие стануваа сѐ полоши и речиси никој не ги контролира“, додаде тој. Тој предупредува дека компаниите кои го почитуваат законот се во ситуација да мора да се натпреваруваат со оние кои не го прават тоа, а Германија станува сѐ понеатрактивна за работниците.
„Контролите мора да бидат масовни“, вели тој.
Моменталната реформа на ЗЗП воведе т.н. условување. Значи, во новиот период на финансирање, тоа ќе се постигне преку директни земјоделски плаќања поврзани со усогласеност со специфичните минимални барања за работните услови, животната средина и благосостојбата на животните на фармата.
Шаум смета и дека е неопходно да се зајакне меѓународната соработка со Европскиот инспекторат за труд. Според него, политиката на новата влада треба да се усогласи со Директивата на ЕУ за сезонските работници, вклучително и оние од трети земји, пренесува Agroklub.rs.
