Агенцијата за иновации, научно-технолошки развој и претприемништво – ИНОВА објави јавен повик за избор на организации за деловна поддршка на претприемништвото, кои ќе учествуваат во реализацијата на програмите „Поддршка за самовработување“ и „Ваучерски систем на советување“.
За спроведување на програмските активности предвидени со Годишната програма за работа на Агенцијата за 2026 година се обезбедени вкупно 60,2 милиони денари, наменети за поддршка на идните претприемачи и унапредување на работењето на микро, малите и средните претпријатија.
Од вкупниот износ, 57.775.000 денари се наменети за поддршка за самовработување, а 2.500.000 денари за Ваучерскиот систем на советување.
Преку програмата за самовработување, невработените лица и потенцијалните претприемачи ќе добијат поддршка за претворање на своите бизнис-идеи во конкретни деловни иницијативи, вклучително и преку подготовка на бизнис-планови и започнување сопствен бизнис.
Ваучерскиот систем на советување, пак, ќе овозможи пристап до специјализирани консултантски услуги за постојните компании, со цел надминување на деловните предизвици и поттикнување на нивниот понатамошен раст и развој.
Право на учество на јавниот повик имаат правни лица, фондации за поддршка на претпријатија и здруженија за микро, мали и средни претпријатија кои располагаат со соодветен стручен кадар, релевантно искуство, воспоставени партнерства и потребни технички и просторни капацитети.
Избраните организации ќе склучат тригодишни договори со ИНОВА и ќе добијат статус на овластени организации за деловна поддршка, со што ќе се вклучат во системот за советување и поддршка на претприемништвото.
Рокот за пријавување е 15 дена од објавувањето на јавниот повик, односно до 13 ноември 2026 година. Пријавувањето се врши електронски преку Националниот портал за електронски услуги.
Целосниот текст на јавниот повик и придружната документација се достапни на веб-страницата на ИНОВА: https://inova.gov.mk/јавен-повик-бр-1-2026-за-пријавување-и-избор/.
МИА
