Инфо ден на АГРОТИМ: Мерката „Рурална жена“ претставена пред земјоделците во Неготино

Најновата мерка на Владата  „Поддршка за активен женски член во земјоделското домаќинство“ или популарно наречена „Рурална жена“ со која се добива грант од 3000 евра наиде на голем интерес кај земјоделците во државата.

Денеска во просториите на Општина Неготино се одржа инфо ден во организација на Платформата за информации од агрокомплексот и агроберза – АГРОТИМ.

На присутните земјоделки и земјоделци од неготинско, за условите и критериумите при аплицирање за мерката, зборуваа претставниците од Министерството за земјоделство, шумарство и водостопанство и од Агенцијата за поттикнување на развојот на земјоделството.

Најчестите прашања до претставниците на институциите беа за прифатливите трошоци и за начинот на аплицирање, кои документи се потребни.

Прифатливи трошоци за финансирање се:

• Набавка на опрема за преработка и/или доработка на примарни земјоделски производи поврзани со видот на инвестицијата;
• Набавка на опрема за постбербени активности, преработка на фарма и директен маркетинг на фарма;
• Опрема за прием, собирање и чување;
• Опрема за подготовка за сортирање, чистење, миење, сушење и дезинфекција;
• Обложување со восок, сортирање, калибрирање, отстранување на оштетени плодови, детектирање на метал и стакло или други цврсти материјали;
• Опрема за предладење, ладење и замрзнување;
• Опрема за сечење, мелење и останата опрема за преработка;
• Опрема за филтрација, де-аерација, ферментација, стабилизација, сепарација, хомогенизација, пастеризација и стерилизација;
• Резервоари танкови;
• Опрема за конзервирање, сушење, десикација, замрзнување;
• Опрема за флаширање, полнење, пакување и означување/етикетирање;
• Зашеметување, искрварување, опрема за горење и опрема за отстранување на внатрешни органи;
• Опрема за сечење и откостување;
• Лабораториска опрема и апарати за анализа на производот;
• Опрема за манипулација, утовар и истовар, виљушкари , транспорт–приколки, ладилници палети, приклучни возила за ладење, подвижни ленти, опрема за мерење и квалитет;
• Опрема за следење на квалитетот, контрола системи со следливост на прием на производ, складирање и дистрибуција;
• Третман на отпад, валоризација, опрема за ракување и складирање;
• CIP опрема (Clean In Place);
• Опрема за подобрување на стандардите за благосостојба на животните, како што се редовен пристап за обезбедување на свежа вода, храна, сместување на животните пред колење;
• Оперативни трошоци за маркетинг на преработки од примарни земјоделски производи;
• Набавка на потрошен материјал поврзан со инвестицијата и кој е создаден во рамките на реализација на деловниот план (амбалажа, печатени материјали, изработка на логоа, декларација и сл.)

Трошоците од инвестицијата не смее да се финансирани од друг извор на финансирање (забрана за двојно финансирање) – беше потенцирано на средбата.

Што се однесува до потребните документи за аплицирање, советниците велат дека не се комплицирани и може да се подготват:

1. Барање за финансиска поддршка генерирано преку системот за електронско поднесување на барање на e-baranje.ipardpa.gov.mk за мерка 115 (барањето треба да се испечати и да биде своерачно потпишано од страна на поднесувачот на барањето)
2. Понуди/профактури со детална техничка спецификација за производите за кои се бара финансиска поддршка (оригинал со потпис и печат).
   Понудите од странство треба да бидат преведени на Македонски јазик заверени од овластен судски преведувач)
3. Деловен план – изготвен согласно Упатството за изготвување на деловен план
4. Решение за упис во Единствениот регистар на земјоделски стопанства
5. Годишна даночна пријава (УЈП)
6. Потврда од Министерство за труд и социјална политика за социјален статус – самохран родител
7. Потврда од Фондот за инвалидско и пензиско осигурување за лица регистрирани како индивидуален земјоделец согласно Законот за пензиското и инвалидското осигурување

Сите баратели потребно е да се регистрираат во системот за електронско аплицирање. Деталниот опис на постапката за регистрација се наоѓа во „Упатство за регистрација“. Регистрацијата е еднократна, а добиеното корисничко име се користи за поднесување на сите идни барања за финансиска поддршка како и барања за исплата на средства.

На средбата земјоделците посочија дека се потребни почести средби со вработените од институциите а исто така очекуваат и лично да бидат информирани од надлежните институции кога Владата носи мерки што можат да им го модернизираат производството.

Рокот за поднесување на апликациите е до 26 декември, оваа година.