Хрватските надлежни органи блокираа осум тони црвени лути пиперки увезени од Албанија, откако лабораториските анализи покажале присуство на три забранети земјоделски препарати, објави албанската телевизија „Топ чанел“.
Се работи за пиперки произведени на подрачјето на Дивјак, а целото количество ќе биде уништено во Хрватска поради ризикот по здравјето на луѓето.
Ова не е изолиран случај – само минатиот месец беа уништени четири тони домати од Берат, кои содржеле петпати поголема количина од дозволеното на инсектицидот хлорфенапир.
Претходно, Хрватска и Босна и Херцеговина уништија повеќе од 10 тони праски од Дивјак, поради високо присуство на тешкиот метал никел, додека словенечките власти вратија неколку тони од истото овошје назад на албанската граница.
И покрај овие случаи, албанското овошје и зеленчук и понатаму завршува на пазарите во соседните земји, каде што жителите, особено во пограничните региони, најчесто ги купуваат директно од локалните производители.
