Храната и енергијата ја зголемуваат инфлацијата во Србија

Народната банка на Србија објави дека на зголемувањето на инфлацијата во претходниот месец влијаеле цените на непреработената храна и енергија, кои, како што велат, сочинуваат една четвртина од потрошувачката кошница.

Повикувајќи се на податоците на Републичкото биро за статистика, НБС наведува дека инфлацијата во септември годинава изнесува 0,8 проценти на месечно ниво, односно 5,7 проценти повеќе отколку во истиот месец минатата година.

НБС посочува дека цените на непреработената храна во септември годинава, во однос на септември минатата година, биле повисоки за 17,9 проценти, најмногу како резултат на порастот на цените на свежиот зеленчук од 36,2 проценти и растот на цените на свежото месо од 15,1 проценти.

Во помала мера, за растот на цените на непреработената храна придонел и растот на цените на свежото овошје од 6,2 проценти.