Министерот за земјоделство, шумарство и водостопанство, Арјанит Хоџа, заедно со проектниот менаџер на CARE International, Драган Периќ, го потпишаа сертификатот за примопредавање на Системот за следење на функционирањето на земјоделските задруги.
-Денеска, заедно со проектниот менаџер на CARE International, Драган Периќ, го потпишавме сертификатот за примопредавање на Системот за следење на функционирањето на земјоделските задруги.
Овој систем е изработен за потребите на Министерството за земјоделство, шумарство и водостопанство, со поддршка од проектот „Поддршка за развој на земјоделски задруги“, финансиски поддржан од Европската Унија, а имплементиран од CARE International и Македонската развојна фондација за претпријатија (МРФП).
Целта на системот за следење е прибирање на податоци за земјоделските задруги и нивните членови (земјоделските стопанства), следење на резултатите од нивното работење преку пресметка на утврдени индикатори, како и следење на ефектот на националната програма врз нивниот развој.
Здружувањето во задруги е една од нашите развојни компоненти, со кои земјоделскиот сектор станува поконкурентен, а имплементацијата на системот за следење ќе овозможи детален приказ на постигнатите резултати. – напиша министерот Арјанит Хоџа на својот фејсбук-профил.
