Неодамна отворената шума во Данска сведочи дека и децата можат да се грижат за шумите. Локалните власти во соработка меѓу општина Архус и данската организација „Засади дрво“ (Plant a Tree) пред неколку дена претставија детска шума во која децата од градинка и од основно училиште имаат можност да засадат дрвца и да се грижат за нив. Околу 400 деца од различни основни одделенија како и оние од градинките во општина Архус деновиве ги засадија првите дрвја за отворениот ридски предел во Ајструп да го претворат во идна дива шума.
Со 40.000 новозасадени дрвја во крајбрежниот град Ајструп во источен Јутланд, шумата ќе биде главниот проект за проширување на училишните шуми во Данска кои ќе растат и ќе се развиваат и ќе станат место каде што учениците ќе можат да одат на училишни излети и кампување. За време на овие екскурзии, планот е децата да се научат на основните вештини кои ќе им овозможат да живеат и опстојуваат во природа. Поточно, ќе научат да палат оган, да се снаоѓаат без употреба на компас или ГПС, да берат растенија што можат да се јадат а се многу покорисни, а одамна заборавени.
„Децата се идни амбасадори на природата и патувањето во дивината може да им помогне да ги разберат сите вредности и ресурси што ги има природата. Се надеваме дека добрите искуства во природата ќе ги мотивираат децата добро да се грижат за неа“, вели Јенс Досинг, национален претседател на „Засади дрво“, кој помогна да се координираат донациите и да се соработува во создавањето на Детската шума.
Детската шума потенцијално може да добие вкупна површина од 20 хектари. Низ областа ќе поминува само еден шумски пат и еден расчистен пат, а посетителите на шумите ќе треба сами да се пробијат низ шумата, каде што ќе се дозволи сѐ да расте диво. Кога шумата ќе биде целосно развиена, зависи од поддршката на училиштата кои ќе се вклучат во овој проект.
