Германското Министерство за земјоделство подготвува национална регулатива која ќе стапи на сила од пролетта 2023 година, со која, како што е најавено, ќе се забрани извоз на одредени производи за заштита на растенијата кои се штетни за здравјето на луѓето и чија употреба е забранета во ЕУ.
Министерот за земјоделство Џем Оздемир оценил дека е неприфатливо да се продолжи со извоз на штетни пестициди, објави Еуроактив.
Оздемир нагласи дека Германија ќе инсистира на забрана на извозот низ ЕУ заедно со Франција со цел да се обезбеди „заштита на здравјето на луѓето и да се постават глобални стандарди“.
„Луѓето насекаде имаат исто право на здравје, а тоа мора да важи и за земјоделците во другите земји“, рече Оздемир.
Германија во 2021 година извезла повеќе од 8.500 тони активни неодобрени супстанции кои се користат во производите за заштита на растенијата, од вкупно извезените 53.000 тони, соопшти Министерството, кое смета дека околу 160 неодобрени супстанции имаат својства штетни за здравјето на луѓето, пренесува Еурактив.
