Нов европски рекорд во големина на град беше поставен во Ацано Децимо, Италија, со неверојатни 19 сантиметри.
За 3 сантиметри го надмина овој необичен рекорд поставен пет дена претходно, бидејќи, исто така, во Италија, во Кармињано ди Брета, падна град кој во својата најдолга оска имаше 16 сантиметри, објави Европската лабораторија за силни бури (ESSL).
Во доцните вечерни часови овој понеделник, селото Тиецо, во општина Ацано Децимо, на околу стотина километри од Трст, беше погодено од силен град, што резултираше со големи парчиња мраз.
„За жал, не ја знаеме тежината на оваа огромна топка, која е тешко да се нарече зрно, но секако е потешка од 1 кг. Земете предвид дека парчиња со оваа големина паѓаат со брзина поголема од 150 км/ч.“, коментираат во објава на фејсбук-страницата Торнадо во Италија. На фотографијата што ја објавија се гледа должина од 20 сантиметри и ширина од 16 сантиметри.
Огромна штета во земјоделството
Огромна катастрофа со денови ја погодува Италија. Во вторникот невремето однесе пет животи, како на северот на земјата, така и на Сицилија, каде што беснеат пожари поради топлотниот бран.
Голема штета настана на површините со пченица, пченка, соја, шеќерна репка, сончоглед, зеленчук, овошје и винова лоза. Уништени се пластеници и земјоделски капацитети, пишува италијанското здружение на фармери Coldiretti. Велат дека оваа временска непогода се случила во фаза кога штетите се ненадоместливи, а годинава во таа земја би можела да ги надмине минатогодишните 6 милијарди евра.
