Европскиот парламент усвои предлог за вклучување на екоцидот во Директивата за заштита на животната средина преку кривичното право. Во новиот предлог на пратениците, претставен минатата недела, е вклучена законска дефиниција за екоцид и релевантни поими.
„Ситуацијата на полето на животната средина на нашата планета е повеќе од критична. Неопходна е нова ера на законодавство“, изјави пратеничката на Зелените, Мари Тусан, пренесува Stopecocide.
Според нацртот на Европскиот парламент, сериозната штета нанесена на квалитетот на воздухот, почвата или водата, биолошката разновидност, треба да се гледа како кривично дело со посебна тежина.
Прекршителите, без разлика дали се компании или поединци, би биле санкционирани во согласност со правните системи на земјите членки, а санкциите би можеле да бидат парични или затворски казни.
Активистите го поздравија можното додавање на екоцидот на листата на казниви дела во ЕУ. Сметаат дека носењето на законот за екоцид ќе се прелее и во други земји, како и дека ќе го отвори патот екоцидот да стане амандман на Римскиот статут на Меѓународниот кривичен суд. Целта на активистите е да се признае екоцидот како петто меѓународно злосторство покрај постојните четири – геноцид, злосторства против човештвото, воени злосторства и злосторства против мирот (агресија).
