Европската Унија воведува построги стандарди кога станува збор за олово и кадмиум во храната, како дел од поширокиот план за превенција од рак.
Од вчера (понеделник, 30.8.2021), се применуваат новите ограничувања за оловото во храна за новороденчиња, зачини, вина и сол, а од денеска, нови ограничувања се однесуваат на кадмиумот во овошјето, зеленчукот, житарките и маслодајните семиња.
„Како дел од напорите за подобрување на здравјето преку пристап до здрава исхрана и физичка активност во рамки на Европскиот план за борба против ракот, одлучивме дополнително да го намалиме присуството на канцерогени загадувачи во храната“, рече европската комесарка за здравство, Стела Киријакидес.
Оловото и кадмиумот се токсични канцерогени материи. Новите стандарди се засноваат на новите податоци, кои покажуваат дека не постои праг под кој со сигурност може да се исклучи нивното штетно влијание врз здравјето на луѓето.
Европската агенција за безбедност на храна, исто така, неодамна изрази загриженост дека изложеноста на олово во храната може да влијае на невролошкиот развој на фетусите, новороденчињата и децата.
Размерно високи нивоа на олово се откриени во алгите, рибите, морските плодови и додатоците во исхраната.
Германското министерство за животна средина предупреди дека и други намирници, како што се житарките и зеленчукот, исто така, можат во значителна мера да придонесат во внесот на оловото, иако го содржат во релативно мали количини, но луѓето многу ги консумираат.
За повеќето видови сол, новите правила ќе важат за ограничување од 1 мг олово за килограм.
Кадмиумот влегува во околината преку процесите на согорување или талог од канализација, а може да навлезе во почвата и преку фосфатните ѓубрива.
Извор: swordstoday.ie, foodnavigator.com
