Одобрени се нови правила за авторизација на биолошки производи за заштита на растенијата кои содржат микроорганизми (бактерии, габи и вируси) за да се намали зависноста од хемиски пестициди. Како што објави Европската комисија во четвртокот (10 февруари), усвоени се четири закони за да се осигури дека новите биолошки решенија се пласираат на пазарот „значително побрзо“.
Се очекува да стапи на сила до ноември.
Исти критериуми како и за хемиските
Според важечките прописи, биолошките производи за заштита на растенијата подлежат на истите строги критериуми за тестирање како и хемиските. Чекањето три или четири години за одобрување се смета за предолго. Затоа, барањата наскоро ќе треба да се прилагодат на биолошките и еколошките својства на производот, а треба да се напомене дека досега се одобрени повеќе од 60 микроорганизми за употреба во заштитата на растенијата во Европската Унија.
Немањето посебна регулатива беше ограничувачки фактор поради што овие средства не можеа да го достигнат својот целосен потенцијал. Поради оваа причина, дизајнирани се правни акти кои ги одразуваат најновите научни достигнувања и се засноваат на специфичните биолошки својства на микроорганизмите. Ова вклучува поедноставни апликации, проценка на ризик, пократки рокови за пристап до пазарот на ЕУ и помалку тестирање на животни. Но, мора да се докаже дека тие не предизвикуваат болест кај луѓето или животните.
Да се обезбеди алтернатива
Објавувајќи ја одлуката за новите правила, Стела Киријакидес, задолжена за здравје и безбедност на храна, рече дека земјоделците сега можат да користат органски производи за да ги заштитат своите култури со помал ризик за здравјето на луѓето или за животната средина.
„Системите за храна се клучни двигатели на климатските промени и деградацијата на животната средина и ние треба итно да ја направиме оваа транзиција. Како дел од стратегијата „Од поле до маса“, ние сме посветени на намалување на употребата на хемиски пестициди за 50 проценти до 2030 година, а за тоа е клучно да се обезбедат алтернативи кои ја почитуваат нашата планета и нашето здравје“, рече таа.
Џенифер Луис, извршна директорка на Меѓународната асоцијација на производители на биоконтрола (IBMA), го поздрави фокусот на Комисијата на ова прашање: „Систем за брз мониторинг мора веднаш да се спроведе за микробиолошките и другите биоконтроли да ги исполнат целите за намалување на пестицидите“.
Според стратегијата „Од поле до маса“, употребата и ризикот од хемиски пестициди треба да се преполови до 2030 година и да се поттикне еколошкиот сектор и употребата на интегрирано управување со штетници. Сепак, земјоделските организации посочуваат дека алтернативи сѐ уште не се достапни.
