Европската Унија се подготвува да ги извезе речиси сите украински земјоделски производи преку таканаречените коридори на солидарност, изјави европскиот комесар за земјоделство, Јануш Војчеховски.
„Подготвени сме да извеземе речиси се. Тоа се околу 4 милиони тони маслодајни растенија и житарки месечно, а тој обем го постигнавме во ноември минатата година“, рече тој.
Пред Русија да се повлече од договорот за извоз на жито од Црното Море, посредуван од Турција и ОН, Војчеховски рече дека 60 отсто од извозот на Украина се испорачува преку солидарните коридори, додека 40 отсто одел преку Црното Море.
Претходно, министрите за земјоделство на ЕУ се состанаа во Брисел за да разговараат за можностите за извоз на украинско жито, но на начин да се заштитат земјоделците од земјите кои граничат со Украина.
Германскиот министер за земјоделство Џем Оздемир предупреди дека министрите мора да ги урамнотежат двете прашања без да ја поткопаат поддршката на ЕУ за Украина.
„Ако се појават пукнатини во единството на ЕУ, единствениот што ќе биде среќен е рускиот претседател Владимир Путин“, рече Оздемир.
Министерот за земјоделство на Литванија, Кестутис Навикас, предложи да се префрлат извозните процедури за жито од украинско-полската граница до литванските пристаништа за да се избегне заканата од заглавување на транспортот на жито во Полска, пренесува Apk-inform.
