Европската комисија вчера одлучи трговскиот договор со јужноамериканскиот блок Меркосур да биде привремено имплементиран, откако го ратификуваа Аргентина и Уругвај, а наскоро тоа ќе го сторат и Бразил и Парагвај.
„Во јануари, Европскиот совет ја овласти Комисијата привремено да го спроведе договорот штом првата земја од Меркосур го ратификува. Како резултат на тоа, Комисијата сега започнува со привремено спроведување“, рече претседателката на Комисијата, Урсула фон дер Лајен.
Европскиот парламент во јануари со тесно мнозинство го изгласа предлогот со кој се бараше од Судот на правдата на ЕУ мислење за тоа дали договорот може да се примени пред целосна ратификација во сите земји-членки и дали неговите одредби ја ограничуваат Европската Унија да ги спроведува своите политики за животна средина и здравје на потрошувачите.
Бидејќи на Судот обично му требаат две години за да издаде мислење, тоа значи дека ратификацијата на договорот е одложена дотогаш, бидејќи Парламентот не може да гласа за него пред одлуката на Судот.
Комисијата сега одлучи за привремена имплементација, што сигурно ќе предизвика незадоволство кај Франција, Полска и некои други земји кои стравуваат дека договорот ќе ги загрози нивните земјоделци. Од друга страна, Германија и Шпанија ја предводат групата земји кои силно притискаат за имплементација на договор што обезбедува нови можности за извоз за нивните производи.
Европската унија и земјите од јужноамериканскиот трговски блок, во јануари, во главниот град на Парагвај, Асунсион, го потпишаа историскиот договор за слободна трговија што опфаќа 700 милиони граѓани.
Пред потпишувањето, земјите-членки на ЕУ, меѓу кои и Хрватска, го поддржаа договорот. Франција, Полска, Австрија, Ирска и Унгарија гласаа против.
МИА
