Индустриските политики бележат оживување и нивната растечка популарност е примарно обликувана од домашните политичко-економски услови и од растечките геополитички тензии. Иако овие политики обично се применуваат во економиите во повисоки приходи, се почесто се користат и во економиите со помал административен и фискален капацитет, оценува Европската банка за обнова и развој (ЕБОР) во најновиот извештај „Извештај за транзицијата, навигација во индустриските политики“.
Според Фатих Туркменоглу од ЕБОР, Македонија има направено импресивен чекор во нејзината зелена транзиција, развој на инфраструктурата и зголемување на пристапот до финансии за деловните субјекти и за граѓаните.
-Стратегијата на ЕБОР за Македонија за периодот 2025 – 2030 година, која беше усвоена овој месец, има јасни приоритети за регионалната интеграција, одржливата инфраструктура и зајакнување на поконкурентната и инклузивна економија. Како што е истакнато во Извештајот за транзицијата 2024-2025 година-Навигација во индустриските политики, истите може да играат критична улога во обликување на долгорочната конкурентност и отпорност на земјата. Во Северна Македонија, нашите инвестиции се стремат кон креирање на значајни можности кои ги охрабруваат луѓето да ја градат нивната иднина дома, преку поддршка на инклузивен раст и помош во справување со демографските предизвици. Јас сум оптимист за иднината и посветен сум во испорачување на уште поголемо влијание во годините кои следат, истакна Туркменоглу.
Гувернерката на Народната банка Анита Ангеловска-Бежоска, слободните економски зони, како основна алатка на индустриската политика, одиграле позитивна улога во привлекувањето на странските претпријатија, создавањето на работни места и зголемувањето на продуктивноста во македонската економија, но придобивките би биле поголеми доколку трансферот на знаење и врските меѓу странските инвеститори и домашните компании се зајакнуваат.
-Очигледно е дека овие компании, согласно проценките на Народна Банка, имаат позитивни ефекти врз билансот на плаќања, генерирајќи нето девизен прилив од 17,8 проценти од БДП во периодот 2014-2023 година. Но, придобивките можат да бидат поголеми ако трансферот на знаење, технолошката дифузија и врските помеѓу странските инвеститори и локалните бизниси се зајакнат. Моментално се проценува дека фирми кои работат во зоните користат само околу 10 проценти од нивните потреби, од македонските локални претпријатија, подвлече Ангеловска-Бежоска.
ЕБОР досега има инвестирано над 2,9 милијарди евра во 198 проекти во државава. (МИА)
