Државен тракторски натпревар за средношколци ќе се реализира во среда во Кавадарци, информираше денеска во изјава за МИА, Ефремчо Николов, професор во кавадаречкото Средно земјоделско – шумарско училиште, ,,Ѓорче Петров”. Целта на натпреварот е ученици да се стекнат со практични вештини врз основа на теоретската и практичната наобразба што ја стекнале во текот на школувањето. Натпреварот е признат од МОН и Центарот за средно стручно образование и обука, а учество ќе земат вкупно околу 130 ученици, 55 професори ментори, а како претседатели на секоја поединечна дисциплина ќе бидат вклучени и универзитетски професори од Штип и од Скопје.
– Во организација на здружението на земјоделски и шумарски училишта на Македонија, Тера-Фитон-Анимал и нашето училиште што постои 67 години, го организираме 51 државен тракторски натпревар. Во натпреварот учество ќе земат 10 земјоделско – ветеринарни и шумарски училишта со нивните професори и ментори. Учениците ќе се натпреваруваат во шест дисциплини. Вешто возење и управување со трактор со категории машки и женски, препознавање на семиња и плевели, коски и органи кај домашни животни, калемење на овошки, аранжирање на цветни аражмани и органско земјоделско производство, појасни Николов, кој е потпретседател на здружението на земјоделско – ветеринарни и шумарски училишта.
Според агендата, натпреварот треба да го отвори градоначалникот Митко Јанчев, а свое обраќање да имаат и претседателот на здружението на земјоделски и шумарски училишта Игорче Николов и директорката на училиштето Ратка Росомански.
