Еврото падна на најниско ниво во последните 16 месеци во однос на американскиот долар, откако новите податоци за инфлацијата во САД ги поттикнаа инвеститорите да вложуваат повеќе во американската валута. Според податоците од девизниот пазар Форекс, еврото во 14:30 часот се тргуваше за 1,11251 долари, објави „Трединг економикс“. Годишната инфлација во САД во септември достигна 3,7 проценти, над очекувањата на пазарот. Ова ги зголеми прогнозите дека Федералните резерви би можеле да ги задржат каматните стапки на сегашното ниво или дополнително да ги зголемат.
Таквите очекувања го прават доларот попривлечен за инвеститорите. Американските државни обврзници и другите финансиски инструменти деноминирани во долари можат да понудат повисоки приноси, што ја зголемува побарувачката за американската валута. Од друга страна, еврото е под притисок поради очекувањата дека Европската централна банка би можела да го одложи евентуалното ново зголемување на каматните стапки до декември.
Дополнителен ризик претставуваат инфлацијата, поскапото задолжување и можноста за забавување на економскиот раст во еврозоната. Загриженоста е засилена и поради фискалните проблеми на високо задолжените земји, особено Франција. Различните очекувања за монетарната политика на САД и еврозоната продолжуваат да влијаат врз движењата на девизниот пазар, при што доларот добива предност, а европската валута се соочува со зголемен притисок.
Извор: slobodenpecat.mk
