– Од почетокот на годината до март месец, пред прогласување на вонредната состојба во државата, исплатени се 60 милиони евра за сите земјоделци за основни субвенции по површина и грло. Следно според динамиката на исплата на Платежната агенција е исплатата за тутунот што е во висина од 31, 5 милиони евра. Но таа планирана динамика е забавена, многу фирми, го редуцираат производството, некои фирми поради појавата и воопшто не работат па приливот на средствата во буџетот на РСМ е значително намален – изјави министерот за земјоделство Трајан Димковски во денешното гостување на Радио Пела.
– Што треба да знаат тутунарите, дека буџетот на РСМ е над 4000 милијарди евра, но тие пари не ги имаме во јануари па ќе ги делиме во текот на годината, туку се прибираат парите во буџетот во текот на годината од сите даночни обврзници. До пред појавата на пандемијата со Корона вирусот, се’ одеше според планот, односно динамиката на исплата, што покажува и исплатените 60 милиони евра за земјоделците. Но сега имаме значително, драстично намалување на приливот на пари во буџетот бидејќи фирмите или не работат воопшто или работат со минимален, намален капацитет. Исто така и граѓаните не трошат како пред вонредната состојба во државата. Во вакви услови кога здравјето на граѓаните е најважно, приоритет во ребаланс на буџет ќе има министерството за здравство, а потоа се друго – изјави Димковски и додаде дека ќе се направи се да се исплатат субвенциите.
Ние ќе направиме се што е во наша моќ, колку може побрзо да ги исплатиме субвенции за тутунот, но ве молиме сепак да имате трпение и да покажете разбирање за новонастанатата состојба. Оваа Влада исполни се што вети, па така и оваа обврска ќе ја исполниме – изјави Димковски.
