Од 5 до 7 февруари во Берлин се одржува престижниот саем за овошје и зеленчук „Фруит Логистика“. Нашите извозно ориентирани компании не пропуштија и оваа година да бидат дел од овој важен настан каде на едно место можат да се најдат светски познати производители и трговци на овошје и зеленчук.
Една од македонските компании присутна на Фруит Логистика е „Деспина Комерц 95“ од Росоман – наши најголеми извозници на праски и кајсии кои располагаат со сопствени ладилници и камиони за меѓународен транспорт со кои сами ја транспортираат робата на странските пазари.
-Втора година сме на „Фруит Логистика“. Добро е да се посетуваат вакви престижни саеми затоа што тоа е можност да ги претставиме македонските земјоделски производи, да се видиме со нашите клиенти и соработници но и да оствариме нови контакти за пласман на нови пазари ова 2025 сезона. Со освојувањето на нови пазари за пласман на македонските земјоделски производи ја зголемуваме можноста да дадеме повисоки цени на нашите земјоделци, да го зголемиме производството и да ги мотивираме младите да имаат желба да се занимаваат со земјоделство. Овој месец прославуваме 30 години од работењето на компанијата, ги познаваме состојбите и затоа силно веруваме во поголем развој на македонскиот аграр, особено производството на овошје и зеленчук со кои можеме успешно да се преставивме на пребирливите европски и светски пазари – ни изјави Мартин Димитриевски, менаџер за извоз и продажба во компанијата.
Годинава на „Фруит Логистика“ има близу 2.800 изложувачи кои ќе ги покажат своите производи и услуги пред публика од над 145 земји. А се очекуваат повеќе од 66.000 посетители.
