– Фондацијата „Информација и заштита на природата” во соработка со Министерството за животна средина и просторно планирање и Програмата за животна средина на ОН, денеска на онлајн настан ќе ги презентираат резултатите од проектот „Заштита на диви видови растенија кои се собираат за трговски цели”.
На настанот ќе се обратат директорот на Управата за животна средина и просторно планирање Хисен Џемаили и проектниот координатор на Програмата за животна средина на ОН Искра Стојанова.
Ќе бидат презентирани заклучоци и препораки за зачувување и одржлива употреба на мечкиното грозје, и ќе биде иницирана дискусија меѓу сите заинтересирани страни како најефикасно да се подобри заштитата на дивите видови растенија кои се собираат за трговски цели. Фокусот е на мечкиното грозје, кое се смета за едно од највредните диви растенија за природата и за локалната економија.
Овој вид единствено кај нас не е опфатен во Листата на строго заштитени диви видови и не е под забрана за собирање, а земјава е единствениот извор на ова диво растение во регионот.
Проектот се имплементира во рамки на проектот „Постигнувањето на заштита на биолошката разновидност преку создавање и ефикасно управување со заштитените подрачја и интегрирање на биолошката разновидност во планирање за користење на земјиштето”. Финансиран е од Глобалниот фонд за животна средина (ГЕФ), се спроведува преку Програмата за животна средина на ОН (УНЕП). Главен партнер и корисник е Министерството за животна средина и просторно планирање (МЖСПП), а локален партнер е Фондацијата „Информација и заштита на природата”- ФИЗП, Подружница во Република Северна Македонија.
МИА
Напишете коментар