Глобалните фјучерси на пченицата се зголемија, а тоа беше сигнал до американските земјоделци да ги продаваат своите житарки по повисоки цени.
Како што наведува Ројтерс, меѓу нетрпеливите бил и фармерот Ванс Емке од Канзас. Локалните цени се зголемиле за околу 30 отсто до речиси 12 долари за бушел, што е највисоката сума што овој фармер ја запаметил во 45-те години во кои се занимавал со земјоделство.
Меѓутоа, тој не можел да продаде ништо од неговата претстојна жетва на пченица за идна испорака. Значи, и покрај тоа што цените на фјучерсите на пченката и пченицата толку нагло скокнаа, тешко е да се продаваат, бидејќи купувачите престанаа да купуваат од страв дека нема да можат да заработат од препродажба.
Се чека развојот на ситуацијата
Многумина од нив продолжуваат да се воздржуваат од купување за да видат како понатаму ќе се развива конфликтот во Источна Европа и какво влијание ќе има тоа на пазарот.
Неможноста да се продаде зимската пченица, чија жетва започнува во јуни, врши дополнителен притисок врз американските земјоделци кои треба во готово да платат за семиња и ѓубрива пред пролетната сеидба, закупот на земјиштето и даноците.
Според Американската федерација на земјоделски бироа и американското Министерство за земјоделство, се очекува годинава само сметките за ѓубриво да скокнат за 12 отсто, откако лани пораснале за 17 отсто. Ако земјоделците одлучат да ја намалат површината, тоа би можело да ги намали приносите за есенската жетва во време кога на светот можеби ќе му треба повеќе жито.
Проблеми на пазарот
Невообичаената ситуација што ги кочи производителите произлегува од системот за заштита од ризик што американските одгледувачи и преработувачи на жита го користат долго време за да се осигураат од промени на цените. За секој бушел жито што се обврзуваат да го купат, купувачите продаваат еднаква количина на пазарот на фјучерси како заштита од загуби.
Русија и Украина заедно испорачуваат околу 26 отсто од светскиот извоз на пченица, според најновите податоци на USDA. Извозот преку Црното Море е прекинат.
По почетокот на конфликтот во Украина, шпекулантите интензивно купуваа фјучерси за пченица и пченка, особено претстојните мајски договори. Цената на мајската пченица на Chicago Board of Trade (CBOT) скокна за 54 отсто за само девет трговски дена, од 8,84 долари за бушел на 23 февруари на 13,63 долари на 8 март.
На 9 март, Landus Cooperative, најголемата земјоделска задруга во сојузната држава Ајова, накратко ги суспендирала своите понуди за заеми во готовина за купување пченка и соја. Извршниот директор Мет Карстенс изјави дека Landus, исто така, тројно ја зголемил својата кредитна линија со CoBank, најголемиот американски заемодавач на земјоделците, за да покрие стотици милиони долари во маржи и да обезбеди стабилно работење.
Само во јануари и февруари, CoBank испорачала повеќе од 4,5 милијарди долари заеми и кредити на клиентите.
Пазарот на фјучерси не бил толку нестабилен од 2008 година, кога недостигот на храна ширум светот предизвика немири во некои земји.
