Американските хирурзи успешно пресадиле бубрег од свиња на човек, што е обид да се реши недостатокот од донори на органи.
Хирурзите во Њујорк успешно пресадиле бубрег израснат во генетски изменета свиња на човечки пациент и откриле дека органот работи нормално. Ова научно откритие еден ден може да биде огромен бенефит за тешко болните пациенти.
Пациентот на кој му е извршена експерименталната трансплантација веќе бил на вештачко одржување во живот и без шанси да се опорави, пренесува Би-би-си. Семејство дозволило да се направи експериментот пред да бидат исклучени уредите за одржување во живот, рекле научниците за Ројтерс.
Три дена новиот бубрег бил врзан за нејзините крвни садови и одржуван надвор од телото и на тој начин лекарите имале пристап до него. Хирургот Роберт Монтгомери изјавил дека резултатите од испитувањето на фунцкијата на трансплантираниот бубрег делувале прилично добро. Тој навел дека бубрегот создал очекувана количина на урина, а ненормалното ниво на креатин кој е показател на слаби функции на бубрегот се вратил во нормала после трансплантацијата.
Новиот орган почнал да произведува „речиси веднаш, урина и други отпадни производи“, рекол докторот. Според него, генетски модифицираните свињи може да станат „постојан и обновлив извор на органи“ за луѓето.
Постојаниот прилив на органи – кој на крајот би можел да вклучува и срце, бели дробови и црн дроб – ќе им понуди спас на повеќе од 100.000 луѓе во САД кои моментално се на списоци на чекање за трансплантација, вклучувајќи ги и 90.240 на кои им е потребен бубрег. Дванаесет луѓе на списоците на чекање умираат секој ден.
