Германија и Велика Британија реагираа на објавата на Кремљ за прекинување на договорот за извоз на украинско жито, повикувајќи на обновување на тој важен договор постигнат во јули 2022 година.
Германските власти ја повикаа Русија да овозможи продолжување на договорот, додавајќи дека Москва не смее „да ги натера најсиромашните луѓе на планетата да ги сносат последиците од конфликтот“ меѓу Русија и Украина.
-Се надеваме дека во иднина овој договор за жито нема да биде само за одредено време или за краток временски период, туку дека житото и вештачкото ѓубриво долгорочно ќе можат да се извезуваат од Украина – додаваат германските власти.
Британските власти го изразија своето разочарување и додадоа дека ќе продолжат со преговорите за продолжување на договорот.
-Ако Русија не го обнови договорот, тогаш ќе лиши неколку милиони луѓе од витален пристап до жито – изјавија британските власти.
Портпаролот на Кремљ Дмитриј Песков вчера изјави дека договорот истече и нема да биде продолжен бидејќи не е исполнет делот што се однесува на Москва.
Москва веќе неколку недели се закануваше дека нема да го обнови, жалејќи се на пречки за сопствените испораки на земјоделски производи и ѓубрива кои се дел од договорот.
Првиот заменик на постојаниот претставник на Русија во Обединетите нации Дмитриј Полјански вчера соопшти дека одлуката за раскинување на Договорот за жито е конечна.
На прашањето дали ќе има дополнителни разговори на оваа тема, рускиот дипломат рече: „Колку што знам, нема да има“, пренесе TASS.
Руското Министерство за надворешни работи соопшти дека раскинувањето на договорот подразбира повлекување на гаранциите за безбедност на пловидбата, како и стеснување на поморскиот хуманитарен коридор и затворање на заедничкиот координативен центар во Истанбул.
Шефицата на Светската трговска организација, Нгози Оконџо-Ивела, изјави дека е длабоко разочарана од прекинување на Црноморскиот договор за транспорт на житарки, кој според неа е суштински за да се обезбеди стабилност на глобалната цена на храната.
Потпишан во јули 2022 година во Истанбул и веќе двапати обновен, договорот со кој се дозволува Украина да го извезува своето жито преку Црното Море овозможи околу 33 милиони тони жито да се извезат од украинските пристаништа во текот на изминатата година, и покрај конфликтот.
