Земјоделец во Белгија го привлече вниманието на јавноста откако ненамерно ја „прекрои“ границата меѓу Белгија и Франција.
Земјоделецот решил да го премести граничниот камен бидејќи му стоел на патот по кој скоро секојдневно поминувал со својот трактор и решил да го помести малку повеќе кон француската територија.
Властите му советувале да го врати на првобитното место бидејќи во спротивно Министерството за надворешни работи ќе мора да свика состанок на француско-белгиската погранична комисија, која не се состанувала од 1930 година. А ако не го врати каменот на првобитното место, може да биде казнет.
Потенцијалниот „меѓународен инциодент“ резултираше со шеги и ги насмеа официјалните лица и жителите од двете страни на границата, пренесуваат странските медиуми.
„Ја зголемил територијата на Белгија, а ја намалил на Франција, а тоа не е добра идеја. Јас сум среќен што моето место стана поголемо, но началничката на француското место Bousignies-sur-Roc не би се согласила со тоа“, рекол со насмевка Давид Лавауклс, началник на белгиското место Erquelinnes.
„Верувам дека ќе успееме да избегнеме нова погранична војна“, рекла видно расположена Орели Велонек, началничката на француското место.
