Директорот на Агенцијата за финансиска поддршка во земјоделството и руралниот развој, Никица Бачовски, на гостувањето во емисијата Топ тема на телевизија Телма, меѓу другото, зборуваше за ИПАРД 3 програмата. Потсети какви мерки се предвидени, кој се може да аплицира и кога се очекува да бидат објавени јавните повици.
„ИПАРД 3 програмата официјално беше донесена од страна на Европската комисија лани во март месец, по што следеше потпишување на секторската спогодба, финаниската спогодба и праќање на акредитацискиот пакет од страна на целата ИПАРД структура за којашто се чека одобрување за да може да ги стартуваме јавните повици. Ние веќе објавивме преднајава со којашто најавуваме дека со сигурност во следниот период ќе има повици од ИПАРД 3 програмата главно по основ на три мерки, Мерката за модернизација на земјоделски стопанства, Мерката за инвестиции во преработка и Мерката диверзификација на фарми и развој на мали бизниси“, рече Бачовски.
Бачовски објасни кој се може да аплицира за финансиска поддршка од ИПАРД 3 програмата.
„По искуството што го имам од претходната ИПАРД 2 програма, главно во Мерката 1 за модернизација на земјоделски стопанства се јавуваат физичките лица, односно индивидуалните земјоделци преку проекти за инвестиции во обнова на својата земјоделска механизација, подигање на нови насади, поставување на системи за наводнување и опрема за фарми. Значи главно најголем дел од инвестициите во таа мерка се од физички лица, иако и правните лица, како и за другите мерки не се исклучени. Таму може да се инвестира во нови фарми, реконструкција на веќе постоечки фарми, задругарство и тн.
Во делот на Мерка 3, модернизација на преработувачки капацитети, многу важна мерка, која можеби и најмногу го амортизира оној јаз помеѓу вишокот на произведени основни производи и нивната преработка, овде ги имаме сите млекарници, винарии, преработувачки капацитети, откупни центри, ладилници, коишто се важни за нашата економија.
Со Мерката Диверзификација на фарми и развој на мали бизниси можат да се поддржат инвестиции за изградба на сместувачки капацитети, угостителски капацитети, инвестиции во домови за стари лица, приватни градинки, домови за нега, за рехабилитација. Тука се опфатени сите индустрии кои оперираат во руралните средини и коишто вработуваат повеќе од 50 луѓе или условно кажано, компанија што се занимава со дрвна индустрија во Пехчево, може да користи средства од ИПАРД со цел да се модернизира во делот на машините, да изгради нов капацитет со цел да се развива руралното опкружување, да се вработува руралното население и да немаме концентрација на бизнисите во руралните средини.“, објасни Бачовски.
Во однос на прашањето кога се очекува да бидат објавени јавните повици, Бачовски објасни дека точен датум не се знае, но се очекува тоа да биде за неколку недели.
„Во моментов се чека одобрување на акредитацискиот пакет кој ИПАРД структурата го испрати. Имавме разговори околу тоа кога може да го очекуваме нивното одобрување, се работи за време или неколку недели, тоа е одговорот што го добивме, но она што е битно за нас е да го завршиме она што го почнавме, односно да посетиме повеќе од 45 населени места пред објавување на јавните повици.“, рече Бачовски.
