Во раните утрински часови утре на територијата на Општина Делчево ќе се спроведе авионско третирање против возрасни комарци, информираат надлежните од локалната самоуправа.
Прскањето ќе се врши со препаратот CICERON 2.ULV – широкопојасен инсектицид со еколошки карактеристики, одобрен од Бирото за лекови. Третманот ќе го изврши економскиот оператор „Аероклуб Скопје“, избран преку јавна тендерска постапка.
Од Општината апелираат до пчеларите во регионот да ги преземат неопходните мерки за заштита на пчелните семејства, со затворање на кошниците во текот на третирањето и најмалку 3 до 4 часа по неговото завршување, поради можност од влијание на средството врз пчелите.
Надлежните уверуваат дека третманот се спроведува во согласност со сите прописи за заштита на животната средина и јавната здравствена безбедност.
МИА
