Унгарија, Бугарија, Романија, Полска и Словачка апелираат до Европската комисија да ја продолжи забраната за увоз на украински земјоделски производи во овие земји и по 15 септември, изјави унгарскиот министер за земјоделство Иштван Наѓ за унгарските медиуми.
Според него, ова е единствениот начин да се заштитат интересите на европските земјоделци.
Наѓ оцени дека сумата од 15,93 милиони евра, која унгарските производители ја добиле од ЕУ како компензација, е „речиси симболична во споредба со обемот на штетата“.
Тој исто така нагласи дека пред почетокот на конфликтот, увозот на жито од Украина во Унгарија изнесувал 40-50 илјади тони годишно, додека во 2022 година достигнал 3,5 милиони тони.
Наѓ додаде дека во 2023 година, пред забраната за увоз, во Унгарија секој месец пристигнувале неколку стотици илјади тони жито.
