И покрај тоа што деновиве нашата земја беше зафатена од ниски температури, агрометеорологот Ангелко Ангелески вели дека со оглед на тоа што заради облачноста, во земјоделските региони температурите не се спуштија под нулата, не се очекува ниските температури да влијаат на овошките.
Клучен беше денешниот ден, бидејќи по разведрувањето се чекаше да се види дали ќе има појава на утрински мраз, но засега температурите, иако ниски, не причинуваат поголеми штети, рече Ангелески за Агротим, кој ни објасни како ниските температури влијаат на овошните дрвја.
„Кај расцветаните овошни видови можни се штети во затворен цвет на температури од -3, -4 степени Целзиусови. Јаболчестите овошки се уште не се расцветани, па кај нив поради минусните температури е можно само мало проретчување. Кај овошките кои веќе имаат отворен цвет веќе на -2 степени Целзиусови се забележуваат штети, но тоа не значи дека родот целосно ќе се унушти, особено со оглед на тоа што минусните температури не се во текот на целиот ден, туку само 2-3 часа во раните утрински часови.
Проблемот е кај овошките кои веќе имаат заметнат плод, како што се кајсиите, бадемите. Тие веќе претрпуваат штети на -1 и 2 степени Целзиусови и ниските температури можат да ги изгорат.
Исто така многу е битен и типот на почвата. Алувијалните, пропустливите почви не задржуваат многу вода и растенијата изсржуваат пониски температури.“ , објасни Ангелески.
Ангелески напоменува дека со оглед на тоа што минусните температури нема да се задржат повеќе денови, можно е само проретчување на плодот од помали размери, но тоа пак ќе резултира со покрупни плодови, така што количината на плодови ќе биде иста. односно наместо да се добијат повеќе ситни плодови, ќе се добијат помалку, но покрупни плодови.
