Вештачките акумулации Калиманци и Гратче, кои се дел од хидросистемот Брегалница, се максимално полни со вода и со зголемениот доток од реките што се влеваат во нив, ќе се обезбеди непречено реaлизирање на годишниот план за наводнување.
Од водостопанската подружница „Брегалница“ од Кочани најавија дека сезоната за наводнување официјално ќе почне на 20 април, со што ќе се запазат оптималните рокови за сеидба на оризот и на другите земјоделски култури во источниот регион.
– Во моментот акумулацијата Калиманци располага со 111 милиони кубни метри вода, односно се наоѓа приближно до максималното ниво, додека браната Гратче целосно е полна и со нешто повеќе од два милиона кубни метри веќе е на прелив. Со овие количини ќе обезбедиме успешна сезона за полињата што се наводнуваат од хидросистемот Брегалница. За да се прибере зголемениот доток до почетокот на наводнителната кампања, во Кочанска Река и во Брегалница се испушта дел од акумулираната вода со што се амортизира можноста од неконтролирано прелевање. Подготовките на каналската мрежа за наводнување се при крај, се работи на санација на главниот канал, а три градежни машини се ангажирани за расчистување на земјените вади. Земјоделците од атарот на селата Зрновци, Прибачево и Оризари најавија дека нивните површини се веќе подготвени и можат да ја примаат водата, така што можно е кај нив наводнувањето да почне десетина дена порано од планираниот рок, истакна Благојчо Богатинов, в.д. директор на водостопанската подружница „Брегалница“.
Во изминатите неколку месеци ангажираните работници и механизација исчистија канали и вади со вкупна должина од 150 километри, а заменети се и дел од оштетените бетонски каналети за да се спречи неконтролирано губење на водата.
Според планот за наводнување, од хидросистемот „Брегалница“ оваа сезона ќе се наводнуваат 5000 хектари, од кои илјада хектари со крски култури, а остатокот ќе се засеат со ориз, пренесува МИА.
