Агрохемиските гиганти „Баер“ и „Сингента“ ги прекршиле законските обврски со задржување на информации за ризикот од токсичност од пестициди за човечкиот мозок, објави Европската комисија во вторникот, 18 јули, пренесе Euractiv.
„Ова прашање создава многу сериозна загриженост и сметаме дека се прекршени законските обврски на тие компании“, рече Клер Бури, заменик-директор на Генералниот директорат на Комисијата за здравство DG SANTE на состанокот на Комитетот за заштита на животната средина во Европскиот парламент.
Овие реакции уследија по студијата објавена во јуни во научното списание Environmental Health, во која научниците открија дека агрохемиските гиганти „Баер“ и „Сингента“ не ги проследиле резултатите од неколку студии за токсичноста на некои од нивните пестициди и нивното влијание врз мозокот до надлежните органи на Европската Унија.
Проценките за безбедноста на пестицидите и другите производи за заштита на растенијата во ЕУ главно се засноваат на студии нарачани од самите производители, кои потоа се обврзани да ги пренесат сите добиени резултати до агенциите на ЕУ, особено Европската агенција за безбедност на храна (EFSA) и Европската агенција за хемикалии (ECHA).
Меѓутоа, утврдено е дека од 35 студии поднесени од овие компании до американските власти, девет воопшто не биле објавени од ЕУ – иако повеќето од нив можеле да имаат „реален или потенцијален ефект врз регулативата“, се заклучува во студијата.
Сепак, двете компании тврдат дека ги исполниле сите барања што биле побарани од нив.
„Не ги доставивме тие студии до регулаторите на ЕУ, бидејќи не беа задолжителни и утврдивме дека не содржат нови информации“, изјави Александра Бренд, извршна директорка на „Сингента“ за Европа, Африка и Блискиот Исток, додавајќи дека тогашните европски регулативи за производите за заштита на културите ги охрабруваат апликантите „да ги поднесат само потребните податоци“.
Европската комисија го осуди таквиот потег.
„Она што е направено не е коректно. Не беше во согласност со обврските“, рече Бури, додавајќи дека Комисијата смета дека овие студии требало да бидат проследени.
Извршниот директор на EFSA, Бернард Урл додаде дека од „етичка и научна гледна точка“ не може да се согласи со објаснувањето што го нудат компаниите.
„Тоа не само што е неетичко, туку е и прекршување на регулативата“, рече Урл.
Бури нагласува дека предметните студии не биле „одлучувачки елемент“ за одлуката да не се продолжи лиценцата за употреба на одредени пестициди или да се воведат ограничувања.
Аксел Ми, научник од Универзитетот во Стокхолм, кој е еден од авторите на студијата, вели дека е „можно, но не сосема сигурно“ дека објавувањето на резултатите може да го блокира одобрувањето на пестицидот во ЕУ.
Според Комисијата, земјите членки се одговорни за изрекување санкции и парични казни за странките кои бараат одобрение, во случај на прекршување на законски обврзувачките прописи, како што е неподнесување на релевантни документи.
Досега ниту една земја членка не ја известила Комисијата за нејзината намера навистина да го стори тоа, иако Комисијата „ги потсети на овие случаи“.
„Ги потсетивме сите земји членки на механизмите потребни за да се предвидат санкции и казни за престапничко однесување и да се применуваат доследно“, рече Бури.
