Периодот од пораст на зрното, формирање на гроздот и прошарокот, до зреењето на грозјето е еден од најкритичните во производството на винова лоза. Во овие фенофази се формираат приносот и квалитетот на грозјето, па затоа состојбата на лозовите насади има големо влијание врз добивање здрав и квалитетен род.
Во текот на летниот период, комбинацијата од високи температури, врнежи и зголемена влажност создава поволни услови за развој на повеќе габни заболувања. Најголемо внимание треба да се посвети на појавата на пламеницата, пепелницата и сивото гниење, кои можат значително да ги оштетат листовите, ластарите и гроздовите.
Пламеницата (Plasmopara viticola), најчесто се развива по врнежи и подолготрајна влажност, при што може да предизвика оштетувања на листната маса, болеста предизвикува појава на маслени дамки на листовите, а при посилни инфекции ги зафаќа и гроздовите.
Пепелницата (Erysiphe necator), пак, се развива и во услови на високи температури, а доколку не се контролира навреме, може да доведе до пукање на зрната и намалување на квалитетот на родот. Болеста ги зафаќа листовите, ластарите и зрната, кои се покриваат со бела прашкаста превлака и заостануваат во развојот.
Во фазата на затвaрање на гроздот и за време на прошарокот се зголемува опасноста од појава на сиво гниење (Botrytis cinerea). Густите гроздови, високата влажност и механичките оштетувањата на зрната создаваат идеални услови за развој на ова заболување, кое може да предизвика гниење на гроздовите и значителни загуби непосредно пред бербата.
Покрај болестите, во овој период потребно е редовно да се следи и присуството на штетници, особено цикадите, гроздовиот молец и пајаковите грини. Нивната појава не само што предизвикува директни оштетувања, туку може да го олесни навлегувањето и ширењето на патогени микроорганизми.
Покрај мерките за заштита, големо значење има и примената на соодветни агротехнички практики односо добрата проветреност на насадите, умереното отстранување на листната маса околу гроздовите, редовното отстранување на оштетените растителни делови и континуираниот мониторинг придонесуваат за намалување на ризикот од појава и ширење на болести. Навременото следење на развојот и состојба на лозата и преземањето соодветни мерки во овие фенофази се од клучно значење за зачувување на приносот и производство на квалитетен род.
Извор: Агрометео
