Според ново истражување, топлото време би можело да доведе до зголемен ризик од каснувања од змии ширум светот, бидејќи овие животни ги менуваат своите природни живеалишта.
Многу отровни видови змии, како што се водената мокасинка во Северна Америка, краитот во Азија и црната мамба во Африка, би можеле сè почесто да ги менуваат своите живеалишта поради порастот на температурите и сè поголемото човечко навлегување во природните екосистеми, напиша Индрабати Лахири за Евроњуз.
Истражувањето кое го спроведе Светската здравствена организација (СЗО), е објавено во научното списание „ПЛОС запоставени тропски болести“ (PLOS Neglected Tropical Diseases). Во него се истакнува дека голем број змии би можеле да се преселат поблиску до густонаселените области, како и во региони кои досега не се соочувале со присуство на отровни влекачи, со цел да избегнат растечки температури и уништување на нивните природни живеалишта предизвикано од човекот. Таквите промени би можеле да доведат до почести средби со луѓето, што би довело до зголемен број каснувања, но и до поголема смртност кај змиите.
Иако статистичките податоци за каснувања од змии често се нецелосни и тешко достапни, најголемиот број случаи се забележуваат во тропските региони, особено во Јужна Азија. Според авторите на истражувањето, годишно се регистрираат околу четири милиони нови случаи на каснувања од змии. Новото истражување користи голем број приватни и јавни бази на податоци, музејски записи, научна литература и платформи за граѓанска наука со цел подетално да се утврди географската распространетост на најотровните змии во светот. Потоа се прават обиди да се предвиди како зголемувањето на температурите до 2050 и 2090 година би можело да ја промени распределбата на нивните живеалишта.
Според анализите, неколку видови змии би можеле да бидат принудени да бараат нови живеалишта во наредните децении, како поради климатските промени, така и поради промените во користењето на земјиштето. Меѓу нив се северноамериканските водени мокасинки, африканските плукачи кобри и поскоците во Јужна Америка и Европа, како и краитите во Азија. Ако некои од овие најсмртоносни видови се размножат во густонаселени региони, милијарди луѓе потенцијално би можеле да бидат изложени на зголемен ризик од каснување.
Истовремено, истражувањето укажува дека некои од најголемите ризици од климатските промени се одразуваат токму врз самите видови змии. Ова најверојатно особено ќе ги погоди коралните змии во Амазонија, африканските пуф змии и бакарглавите змии во Папуа Нова Гвинеја, кои би можеле да се соочат и со повисоки температури и со сè поголемо претворање на мочуриштата, пасиштата и шумите во монокултури, сточарски фарми и урбани населби. Во некои екстремни случаи, одредени видови би можеле да бидат доведени и на работ на истребување.
Од друга страна, многу други видови, меѓу кои и црната мамба, најверојатно ќе заминат од кенискиот брег и делови од Еритреја, Етиопија, Џибути и Конго кон области во Нигерија, Јужна Африка и Сомалија. Во густонаселените региони, средбите со змии би можеле да станат почести на локации кои луѓето секојдневно ги користат, како детски игралишта, патеки за трчање, извори на вода и земјоделски површини. Истражувачите предупредуваат дека оваа промена би можела да биде особено смртоносна во сиромашните рурални средини, каде земјоделците често работат боси на полињата, а пристапот до здравствена заштита е ограничен и тешко достапен.
МИА
