Изминатата седмица имавме променливо и нестабилно време, сончево и топло, со повремени врнежи од дожд.
Житните култури во овој период имаат сосема доволно влага и се во добра состојба. Есенскиот јачмен во зависнот од локацијата каде е посеан, е во фаза на млечна зрелост. Започнува последната фаза од животниот циклус на житата – зрелост, каде овде се случуваат поголеми квалитативни промени, пред се, во зрното.
Сончогледот како индустриска култура се наоѓа во фаза на никнење, неговата коренова маса има голема продуктивност, со голема моќ на впивање вода од подлабоките почвени слоеви, со тоа што доколку почвата располага со доволно резерва на влага ќе биде корисна во наредните фази на интезивен пораст, кога се потребни повеќе од 40% од вкупните потреби на растението за вода, односно од цветање до физиолошка зрелост.
Со оглед дека синтезата на масло кај сончогледот значително зависи од присуството на доволно количество на почвена влага. Кај виновата лоза доколку има потреба може да се почне со отстранување на страничните ластари (филизи) во почетокот на нивниот раст. Се препорачува нивно отстранување над гроздовите. Ова е и период на интензивно расадување на тутунот, и на градинарски култури на отворено. Овошките во овој период се во интензивен раст, се препорачува да се продолжи со нивна прихрана и третирање против болести и штетници.
Во следните денови ќе се задржи променливо облачно време. Ќе дува умерен до засилен ветер од северен правец (над 50 km/h). Во петок и во деновите од продолжениот викенд на повеќе места ќе биде нестабилно со пороен дожд, грмежи и засилен ветер. Локално процесите ќе бидат поинтензивни во форма на невреме со пообилен пороен дожд (над 20 l/m²), грмежи и силен ветер (над 60 km/h).
При вакви временски услови земјоделските производители да посветат поголемо внимание на заштита на нивните посеви, можност за појава на болести и штетници, да преземат содветни агротехнички мерки заради постоење на оптимални услови за нивно ширење и развој, уништување на плевели преку плитка обработка на почвата, бидејќи нивната појава може значително да го намали приносот и квалитетот.
Предупредување: Во случај на појава на електрични празнења се препорачува поголема внимателност, да не се престојува под отворен простор. Да се преземат превентивни мерки за зацврстување на пластениците и другите конструкции, да се расчистат одводните канали за полесно одлевање на површинските води и заштита од нив.
Минималната температура ќе се движи во интервал од 6°C до 15°C, а максималната температура ќе се движи во интервал од 19°C до 30°C.
Извор: Агрометео
