Штети кај винови лози и овошки предизвикаа ниски мајски температури во општина Росоман. Оваа информација ја потврди попладнево за МИА, росоманскиот градоначалник Ѓорѓи Крстевски.
– Точно е, има дел зафатено, особено ниските делови на територијата на општината. Ќе ја следиме ситуацијата. Првично, има поголеми штети кај лозови и овошни насади, во долните реони. Во меѓувреме, ја следиме ситуацијата. Во контакт сме сите, со советниците во Советот на Општината и претседателот, претседателот на комисијата за земјоделство. Ги известив и министерот и Министерството за земјоделство. Доколку се утврди дека има поголеми штети, на лице место, во понеделник ќе се свика општинската комисија за земјоделство и доколку има потреба, најбрзо што може ќе се формира комисија за проценка на штети на терен – појасни градоначалникот.
Крстевски истакна дека не памети ова да се случило досега, штети кај виновите лози и овошките од ниски температури во месец мај.
И градоначалникот на Делчево информира дека ја следат состојбата директно на терен.
Во Преспанскиот регион, поточно селата под Галичица, Евла, Болно, Горно Дупени се зафатени од пролетен мраз. Јаболката, сливите, црешите, крушите и дуњите се многу оштетени, а оревите се 100% – информира Пере Транталовски за Агротим.
Земјоделци јавуваат за штети во Тиквешијата и Штипскиот регион.
