Поради санација на дефекти и подготовка за сезоната на наводнување, на 29 април (среда) ќе биде намален дотокот на сирова вода кон филтер станицата, што може да предизвика прекини во водоснабдувањето во повисоките делови на Куманово, информираа денеска надлежните од ЈП „Водовод“.
Од претпријатието, информираат дека добиле известување од АД Водостопанство Скопје, Подружница „Кумановско – Липковско Поле“ дека ќе биде затворен бај-пас системот поради санација на дефекти и тековни активности поврзани со почетокот на сезоната за наводнување.
-Поради оваа интервенција, значително ќе се намалат количините на сирова вода што пристигнуваат до филтер станицата, а со тоа и количината на вода што се преработува и дистрибуира во водоснабдителниот систем на градот- информираа од ЈП „Водовод“.
Од претпријатието додаваат дека се ставени во функција сите расположливи капацитети со цел да се ублажат последиците од намалениот доток на вода. Надлежните апелираат до граѓаните за разбирање и рационална потрошувачка, нагласувајќи дека овие интервенции се неопходни за зголемување на сигурноста на водоснабдувањето во општина Куманово.
МИА
