Царинската управа доби систем за анализа на ризик и податочен склад со кој се очекува да се подобри контролата на целокупниот обем на трговска размена и сузбивање на обидите за криминал и сива економија.
Системот за анализа на ризик и податочен склад имплементиран со грант од Република Кореја во висина од 4,75 милиони долари, а денеска на официјалното промовирање на системот, македонската Царина доби и две кучиња од Кореја кои ќе бидат дел од тимот К9 на Царинската управа.
– Сите податоци за целиот увоз, извоз, транзит, податоците за акцизна стока, целокупната евиденција на заплени, прекршочни и кривични пријави се интегрирани во Системот каде истите се анализираат со поддршка на напредна вештачка интелигенција. Воедно истиот обезбедува податоци за пратки чии вредности се различни од берзанските цени, но и чии вредности се под просечните согласно анализата на вредноста на целокупниот увоз, со што ги алармира царинските службеници за проверка на контејнерите со вакви пратки, сè со цел да се спречат обиди за царинска измама. Во делот на спречување на обидите за криминал, од суштинско значење е и анализата на податоците за патници во воздушниот сообраќај што ни овозможува поефикасно таргетирање на високоризични профили на патници, истакна директорот на Царинската управа Бобан Николовски на заедничката прес-конференција со комесарот на Корејската царинска служба Лимјон Ку.
Со новиот систем, како што посочи Николовски, ќе се овозможи и олеснување на легалната трговија што за фирмите ќе значи пократко време за царинење и помалку трошоци. Ова е овозможено преку зголемената концентрација на контролите на пратките каде претходно системот утврдил дека постои високо ниво на ризик од потенцијални измами, како и анализа на податоците од извршени постконтроли, што придонесува кон забрзување на легалната трговија.
Проектот започна во 2021 година со студија за изводливост и денешната завршница, според комесарот на Корејската царинска служба, е резултат на посветеноста и блиското партнерство меѓу двете влади.
– Преку континуираната комуникација и соработка меѓу нашите две земји тој сега конечно вроди со плод. Од 2008 година, Корејската царинска служба го воведе системот за Е-царинење УНИПАС во 16 земји, и нивниот износ беше 329,37 милиони долари. Овој проект од 4,75 милиони долари е особено значаен за Северна Македонија, бидејќи претставува прво воспоставување на системот за електронско царинење на Царинската служба на Република Кореја во целиот европски регион, рече Лимјон Ку.
Според Ку, кој за првпат доаѓа во земјава, новиот систем не само што ќе придонесе Северна Македонија да се позиционира како балкански лидер со напреден царински систем, туку ќе претставува и инспиративен пример за цврста царинска соработка и пријателство.
МИА
