Шпанија ги регистрира првите случаи на африканска чума од 1994 година, откако две диви свињи пронајдени мртви во близина на Барселона се позитивни на вирусот, соопшти шпанското Министерство за земјоделство.
Избувнувањето епидемија може да го загрози извозот во Кина, кој се зголеми благодарение на напорите на Мадрид да ја привлече наклонетоста на Пекинг и да го зголеми својот пазарен удел во азиската земја. Но, забраната може да биде ограничена откако Кина и Шпанија постигнаа договор овој месец што значи дека Пекинг ќе го ограничи увозот од погодената област, а не од цела Шпанија.
Шпанија е водечки производител на свинско месо во Европската Унија, со околу една четвртина од производството на блокот, пред Германија, според податоците од шпанското Министерство за земјоделство.
Министерството соопшти дека ја известило ЕУ и активирало итни мерки во погодената област, повикувајќи ги свињарските фарми да ги засилат безбедносните мерки додека се проучува изворот на инфекцијата.
Вирусот, кој е безопасен за луѓето, но смртоносен за свињите, се шири на запад низ Европа во последните години. Ширењето на болеста во Германија нанесе удар на големата индустрија за свињи во земјата, при што многу земји воведоа забрани за увоз на свинско месо од таму. Хрватска во последните месеци се обидува да ја контролира епидемијата во свињарските фарми.
МИА
