Земјоделци од шест здруженија во Србија најавија дека ќе започнат протест в понеделник, 15 септември напладне, со трактори пред зградите на Владата и Собранието на Војводина поради неисполнети претходни барања за гориво, кредити и долгови кон Фондот за пензиско и инвалидско осигурување (ПИО).
Претседателот на Иницијативата за опстанок на српските земјоделци, Горан Филиповиќ, за агенцијата Бета изјави дека кон неисполнетите барања од претходните договори со Министерството за земјоделство, додале и барање за помош од 300 евра по хектар за регистрирани обработливи и овошни насади во системот е-аграр.
Како што изјави, протестот ќе започне напладне и ќе трае еден ден, а во случај државата да не ги исполни нивните барања во рок од десет дена, тие ќе продолжат со протестите, а ги повикаа граѓаните да ги поддржат.
Одлуката за протестот беше донесена синоќа.
Филиповиќ рече дека состојбата во земјоделството е неодржлива и дека сушата уништила од 50 до 100 проценти од родот на пченка и соја, како и други култури и овошје, и дека Министерството за земјоделство „молчи“.
Тој исто така истакна дека земјоделците повеќе нема да започнуваат разговори со надлежното министерство, бидејќи не го почитуваат договорот.
