Во следниот период се очекува поинтензивна работа на Комисијата за заштита од конкуренцијата околу Законот за нефер трговски практики. Комисијата е комплетирана и за се она што што ќе биде утврдено како неправилност во однос на Законот, има пропишано законски одредби што ќе треба да се спроведат.
Министерството за економија и труд е задолжено за спроведување на законот, а според заменик-министерот за економија и труд Марјан Ристески, овој закон не е само за заштита на производителите, добавувачите и трговците, туку и за заштита на стадндардот на граѓаните.
– До Нова Година не беа комплетирани членовите кои се дел од КЗК. Како Министерство за економија и труд го спроведуваме имплементирањето на Законот. Имавме состанок со КЗК така што ветија дека во наредниот период ќе има доста интензивна работа во проверувањеето на договорите меѓу добавувачите и трговците. За она што ќе биде утврдено како неправилност, има предвидено одредени казнени одредби кои ќе бидат спроведени. Овој закон не е само за заштита на производителите, добавувачите и трговците, туку пред се за заштита на стандардот на граѓаните, бидејќи сето тоа на крајот се однесува на цената на крајниот производ, изјави денеска Ристески при посетата на маркетот „Веро“ во Тафталиџе.
Ристески вели дека за првпат се имплементира ваков закон во државата и дека праксата ќе покаже кои се слабостите.
– Ние заедно со КЗК ќе го следиме имплементирањето на Законот и во соработка со бизнис секторот ќе видиме дали во блиска иднина ќе треба да се променат одредени членови, изјави Ристески.
Според трговците, има одредени одредби од законот за коишто треба да се разговара како што се ограничувањето на профитната маржа и ограничувањето на повратот.
– Имаме свои предлози за одредени работи што треба да се променат, што ни направија потешкотии не само на нас како трговски ланец, туку и на самите производители и дистрибутери. Работиме со претставниците на Владата и анализираме дали овој закон ги даде посакуваните ефекти. Има неколку работи што не се добро дефинирани, може да се разговара за ограничувањето на профитната маржа и ограничувањето на повратот што досега функционираше но, сега тие работи според зкаонот се ограничени и прават да не може деловните дневни и месечни процеси да се одвиваа успешно за двете страни, изјави генералниот директор на „Веро“ маркетите Петар Денковски.
Во земјава за првпат се имплементира ваков Закон којшто е изработен по примерот на словенечкиот закон, а користени се и искуства од Хрватска и Бугарија како членки на Европската унија.
Во однос на цените на основните прехранбени производи што беа опфатени со новогодишната кошничка која заврши на 15 јануари, Ристески ги демантираше информациите дека се врши притисок врз трговците за да не ги зголемат цените.
– Тоа било на некоја друга Влада со закани. Оваа Влада не работи со закани туку во интерес на граѓаните. Ние би ги искористиле сите правни инструменти околу заштита на животниот стандард на граѓаните. Со стопанските комори, бизнис секторот, со синдикатите и пред се со граѓаните, имаме навистина добар однос, едно транспарентно однесување. Мерката новогодишна кошничка беше прва во историјата на Македонија со која што сакавме да го поттикнеме степенот на општествена одговорност на македонските компании, вклучувајќи ги и маркетите, рече Ристески.
Според Ристески, токму од поттикнувањето на општествената одговорност произлегла и новата кампања на ланецот маркети „Веро“ во следните три месеци да ги замрзнат цените на 100 основни прехранбени производи и да ги остават истите цени на производите коишто беа дел од новогодишната кошничка. Ристески се надева дека овој пример на „Веро“ ќе го следат и останатите маркети, дистрибутери и производители.
И генералниот директор на „Веро“ маркетите Петар Денковски тврди дека имаат партнерски односи со Владата без никакви условувања и без било какви потреби нешто да се направи.
– Соработуваме на дневна база, се консултираме, но пред се основна цел и интерес и на Владата и на Министерството и на нас како стопански субјект, е да им излеземе во пресрет на очекувањата на потрошувачите, што во овој случај и го правиме. Така што ги слушуваме дневните барања и очекувањата од потрошувачите, за да ги задржиме или намалиме цените, вели Денковски.
МИА
