Албанската Национална управа за храна уништи повеќе од 60 тони мандарини, вратени од земји членки на Европска Унија, поради високо ниво на пестициди, опасни по здравјето.
Последните неколку недели Хрватска, Чешка, Италија и Литванија, кои на големо увезуваат овошје од Албанија, по направените анализи од граница ги вратиле назад камионите натоварени со ова овошје.
– Мандарините содржеле остатоци од неколку супстанции опасни по здравјето на луѓето и се забранети за продажба во ЕУ. Поточно, станува збор за високо присуство од хлорпирифос и фосмет, кои како несакани ефекти имаат влијание врз развојот на мозокот кај децата, нарушувања на нервниот и ендокриниот систем, како и зголемен ризик од срцеви заболувања и рак, објавија албанските медиуми.
Вратените мандарини биле произведени во подрачјето на Берат, Љушња и Фиер, каде нивните сопственици за Топ чанел изјавиле дека „не знаат какви препарати користеле, го купувале тоа што им го даваат трговците“.
– Ќе почнеме проверки и во земјоделските аптеки за да се види дали се тргува со забранети пестициди. Ова може да се повтори. Она што не загрижува е тоа што овие препарати се категорично забранети за употреба, но повеќе од сигурно е дека нелегално се внесуваат во земјава, изјавиле од Агенцијата за телевизијата.
Албанија, во просек годишно извезува над 20.000 тони мандарини, добар дел од нив завршуваат на македонскиот и косовскиот пазар.
МИА
