Околу седумдесет бруцоши денеска се стекнаа со индекс на Факултетот за земјоделски науки и храна, при Универзитетот „Свети Кирил и Методиј“ во Скопје. Пред многубројните присутни на настанот, се говореше за значењето на производството на храна, можностите што им се нудат на студентите на овој факултет и важноста на професијата.
Деканот на Факултетот за земјоделски науки и храна Вјекослав Танасковиќ, рече дека ова е 77. генерација на студенти на Факултетот, кои своето образование ќе го продолжат на една од 10 студиски програми на прв циклус студии.
– Вие избравте да студирате и да се развивате во една од најблагородните и најхуманите струки, струка од која се очекува со вашето учество да влијаете во обезбедување на населението со доволни количества на квалитетна и безбедна храна, им се обрати тој на студентите.
Деканот информираше дека на овој факултет до денес дипломирале преку 8.200 студенти, магистрирале преку 570, а со степен доктор на земјоделски науки се здобиле повеќе од 260 кандидати.
– Она за што последно се заложивме со сегашниот министер е стипендирање од Владата на Северна Македонија за најдобрите студенти во висина од 18.000 денари месечно, со цел намалување на недостатокот на кадар на пазарот на трудот, додаде Танасковиќ.
Ректорката на Универзитетот, Биљана Ангелова изјави дека Факултетот за земјоделски науки и храна, е формиран во 1947 година и се вбројува меѓу најстарите високообразовни институции во нашата држава.
– Тој нуди акредитирани студиски програми на сите три циклуси на студии за оформување академски профил, со знаења и вештини кои се неопходни за профитабилно производство и управување со природните ресурси. Факултетот е меѓу првите институции во земјава кој во 2002 година започна со болоњските реформи и има долга традиција и во меѓународната соработка. Во текот на своето долгогодишно постоење, Факултетот има реализирано 728 проекти во соработка со домашни и странски институции и постигнува врвни резултати и огромниот придонес во образовната и научноистражувачката дејност во областа на земјоделството и храната во регионот и пошироко, нагласи ректорката.
Министерот за земјоделство Љупчо Николовски, соопшти дека за првпат во амбасадата на Германија во Скопје ќе има аташе, лице со импозантно портфолио, задолжено за земјоделство, а ќе го покрива целиот регион.
– Мислам дека е тоа сериозна порака за поддршка, нагласи Николовски, оценувајќи ја таа поддршка како пријателска, стратешка и многу значајна за нас.
Тој нагласи дека поддршката ни е многу важна во процесот на пристапување кон Европската Унија.
Николовски се осврна и на иницијативите и серијата програми за млади луѓе, нагласувајќи дека се единствено Министерство, што одвојува финансиски средства за нивна поддршка.
– Околу 50 студенти изминативе 18 месеци се практиканти во Министерството, добивајќи шест месеци по 70 проценти од минималната плата во државата, додаде Николовски.
За значењето на секторот земјоделство и храна во Германија и воопшто во Европа, се обрати Џем Оздемир, германски федерален министер за храна и земјоделство.
На настанот беше посочено дека во контекст на огромното значење на секторот земјоделство и храна за регионот е и формираната Асоцијацијата на факултети од областа на земјоделските науки во ЈИЕ и соработката на сите овие теми, а токму денес ќе се одржи редовен состанок на овој факултет, на кој присуство ќе земат и двајцата министри и ректорката.
На првиот академски час имаше презентација пред бруцошите, за условите за студирање на овој факултет. За останатите студенти, германскиот министер говореше за условите за германското земјоделство, развојот на производството на храна.
МИА
