Започна кампањата „Лето без пожари“ под мотото „Пламените јазици се незапирливи и палење на шумите е криминал“

Согласно законските обврски за спроведување на превентивни мерки за заштита на шумите од пожари, на ден 26.07.2023 година, на наплатна рампа Миладиновци, претставници од Дирекцијата на ЈП „Национални шуми“ и претставници на шумочуварската служба од Подружниците „Шумарство”- Св Николе и „Караџица”-Скопје, во соработка со Секторот за внатрешни работи Скопје – Одделение за превенција и Шумска полиција, ја спроведоа превентивната кампања „Лето без пожари“, при што на граѓаните им беа поделени флаери со информативно-едукативна содржина, истовремено беа информирани за опасностите од настанување на шумските пожари, посебно во летниот период кога е зголемена опасноста од појава на шумски пожари.
Исто така, граѓаните беа информирани за начинот на вадење дозвола за движење во шума, со оглед дека на сила е делумната забрана за движење во шумите, како и законската регулатива и санкции во поглед на предизвикувањето на шумски пожари.