Министерот за земјоделство, шумарство и водостопанство Љупчо Николовски, информираше дека вчера се завршени финалните консултации со министерот за финансии и дека е дефиниран моделот за Законот за земјоделско осигурување кој е готов и влегува во владина процедура.
– Преку овој закон за земјоделско осигурување овозможуваме земјоделците да ја вратат довербата во компаниите со цел максимално да се осигуруваат земјоделските посеви. Поразителни се бројките за користењето на мерката од Програмата за рурален развој. Околу три проценти од земјоделците го осигуруваат своето производство. Тоа е заради тоа што е изгубена довербата во компаниите. Направивме нов закон и верувам дека Парламентот ќе го усвои овој закон и дека ќе воведеме една нова реформа во земјоделското осогурување што ќе биде уште поголем мотив за земјоделците кога ќе настанат штети да добијат обештетување, рече Николовски.
Николовски очекува овој закон да ги помине филтрите на Собранието и да послужи, како што рече, како дополнителен мотив земјоделците да добијат отштета при некоја непогода и да продолжат со производство.
Во однос на штетите од обилните врнежи кои ги зафатија повеќето земјоделски култури, што придонесе за намалување на бројот на земјоделски производи, Николовски рече дека согласно Законот за заштита и спасување, најголема одговорност во овој дел имаат општините. Тој појасни дека претставниците на општините треба да излезат на терен, да направат записник и по одобрувањето на елаборатите во општинските совети да ги достават до државната комисија за штети.
